ஐம்பூதங்கள்,ஐந்து வாயுக்கள்,ஐம்புலன்,ஐம்பொறி,
மனம், சித்தம், புத்தி, அகங்காரம் எனும் அந்தகரணங்கள்
ஆகிய இருபத்து நான்கு தத்துவங்களும் அசுத்த தத்துவங்களாக,
ஜீவாத்மா விளக்கமாகக் காட்டப்பட்டது.

அந்தகரணம் – மனம்

மனிதராய்ப் பிறக்கினும் மன்ஹிதன் எனும்படி
மற்றோர்க் கிரங்கும் குணமோ
மன்னிக்கும் மேன்மையோ கண்ணியம் அன்பெனும்
மரியாதை அறிய வில்லை
கனியெனச் சிவமயம் கைக்கெட்டும் பொழுதிலோ
காயெனவே மாய உலகே
கைவல்ய மென்றுமனம் பொய்சொல்வ தானது
கடிதளவும் பிடிக்க வில்லை
புனிதராய்ச் சிறப்பதோ போதனை பிறப்பதோ
புக்ககம் புகக் கிடைப்பதோ
போதகனே ஆதிசிவ சாதகனே நாதசம்
பூரணனே அருள வேண்டும்
தனியராய் தவத்தினாய் தண்முகச் சிரிப்பினாய்
தட்சிணா மூர்த்தி யானாய்
தானறியும் மனத்திறம் நானறியச் செய்கவே
தருமபரி பாலன் குருவே