அவாஅறு திருவே, சிவா அலங்காரி,
அறிபொருள் எலா முறைவளே,
அகண்டபேர் அழகே, அளவிலா அருளே,
அரைமதி அணியு மழகே,
அதிகாரி, பதிவிரதை எஜமானி, உயர்வான
ஆன்மறிவின் மேன்மை நிலையே,
அரிதே விழியறியாப் புதிரே, மலையிளவரசி –
அருளே அகிலாண்டேஸ்வரி உமையே
(1)

ஆன்மபரி பூரணி, ஆகமவிதி காரணி,
அறிவோர் துதி யோகமே,
அறுதா மரைமூலம் அமர்ந்தாளும் சூரணி,
அலைகூந்தல் கரு மேகமே,
ஊனுறயும் குறுநகை உதடருளும் காமினி,
உயர்தனத் திருத் தேகமே,
உயரயனின் ஹரிஹரனின் தயவுனது தாயினி –
ஒப்பிலா அகிலாண்டேஸ்வரி உமையே
(2)

கருதிய தெலாமடையும் கலைஞான உருவே,
கருநீல மலர் வண்ணமே,
கரமகிழ வானோர்க்கும் வரமருளும் தருவே,
காவானைத் தலை அன்னமே,
சூரியனும் துதிசெயும் வீரியமே, யாகவளர்
ஜோதிமதி கரியி னிறையே,
சுபமே இந்திரையின் வரமே கரிமுகனுன் –
சுதனே அகிலாண்டஸ்வரி உமையே
(3)

தெய்வத்தின் தெய்வமே, திரிமூர்த்தி வரப்பேறே,
தேவதைகள் சேவை தரவே,
தேறாதோர்க் கரிதான திருவடியின் உருவே,
தெளிந்தீசன் இசையும் உறவே,
உய்வதற் குகந்தநல் லுருவே, சிவமேக
உற்றயிடப் பாக அழகே,
ஊரும் ‘ஈ’ கார உயிரொலியே, பரசக்தி –
உயிரே அகிலாண்டேஸ்வரி உமையே
(4)

உதிக்கின்ற கதிரொளியின் உறைகோடிச் சுடரே,
உயர்மலை யரசின் மகளே,
உருவிழிகள் தாமரையின் முழுமலர்ச்சி அழகே,
உயர்பீடம் உற்ற தலமே,
நதிக்கொள்கா விரித்திட்டை பதிக்கொண்ட கோவே,
நளினமுக முழு மதியளே,
நாலுருவாய் மேருருவத் தாள்கவர்வாய் மதியே –
நலமே அகிலாண்டேஸ்வரி உமையே
(5)

வாதப் பிரதிவாத வழக்குக்கு அப்பாலாய்
வாக்கரிய தீர்க்க நிலையாய்
வாழுமுயிர்க் குயிரான வைரமே, மணியிடை
வைத்த ஒளிச் சைதன்யமே,
வேதச் சுருதிநாத விருப்பமே, வெவ்வேறு
வேள்விகளின் ஒளிப் பீடமே,
வெற்றி அருட்பாலுனது சுற்றிவரும் முவ்வுலகு –
வேணி அகிலாண்டேஸ்வரி உமையே
(6)

ருக்குமுத லானமறை நிர்க்குண மானமுனை
எக்கணமும் துதிக்கும் நிதியே,
ருதமான பருவங்கள் தவஞான உருவங்கள்
வளமேவு முலகின் துதியே,
முக்தியரு ளானயிதழ் சொக்குமணத் தாம்பூல
மிக்கபிறை மேவும் அழகே,
முடியாத முக்கரும முடிவே, நின்னடிவுலக
முதலே அகிலாண்டேஸ்வரி உமையே
(7)

உருவாய், அருவமுமாய், உண்மைச் சிவஞானத்
திருவாய் நின்ற தீஞ்சுடரே,
ஒருவாய், உருவத்தாய், ஒன்றறியா அருமெய்யாய்,
‘ரு’காரமா கின்ற நுண்ணுணர்வே,
தருவாய், ‘ரு’காரத் தண்ணொலியே, பிறந்திறக்கும்
விகாரம் விலக்கும் விளைதருவே,
வருவாய் வல்வினைகள் வழக்கழித்த ஆனந்த
வாரி அகிலாண்டேஸ்வரி உமையே
(8)

வாருல கெலாம்படைத்து வாழ்த்திவரும் தெய்வத்து
வடிவத்தின் நற் படிவமே,
வாசமிகு சந்தனமும் வனப்பும் அலங்கா­ரமணி
வயிற்றில் மும்மடிப் பழகியே,
நீருருவ ஈசன்வசம் நேர்த்ததவ யோகினி
நெஞ்சமலர்ப் பங்கயமுன் மெய்
நெடிதுவளை படர்கொடியே, உடலரனின் இடமே –
நேரி அகிலாண்டேஸ்வரி உமையே
(9)

காவினுரை சிலந்தியொடு கரியானைத் துதியாரம்
களித்தருளி இருள் நீக்கியே,
­கருப்பொருளாய்க் ‘க்லீம்’எனும் கனமந்திர மிருந்து,
கவினுருவம் ‘க்லீம்’ஆக்கியே,
மேவிசிரம் சேர்சிலந்தி மேகமயிர்ச் சீரருளி
மென்கொடியோ என நோக்கியே,
மெய்யாய் எண்காலருளி ஐயாவின் காதலியாய் –
மேவும் அகிலாண்டேஸ்வரி உமையே
(10)

தனித்தவளே, விரிபுவனம் தானமைக்க முன்னிருந்த
தனிமையளே, தடக் கடலிலே
முனித்தவளே, முனைபவரின் மோனமனக் கண்ணிருந்து
முளைப்பவளே, பட ருலகினைத்
துணித்தவளே, வெண்குடைக்கீழ் தூயவிழிக் குவளைஒளித்
தூயவளே கவலி மாலை
பணித்தவளே, மாமாயப் பாரதியே, அருளே –
பார்வதி அகிலாண்டேஸ்வரி உமையே
(11)

‘ஐம்’காரம் எனும்சக்ரப் பிரகார மையமே
அமரிகை, அருட் கைகளே,
அமருலக நலமருளும், அழகுருவே படர்கொடி
அசைகின்ற புனல் மேகமே,
‘ஐம்’கார மந்த்ரவிரு ரீங்கார இந்த்ரவதி
அருளுபயம் ‘ஐம்’ உண்மையே,
அனுதினமு மனமுனைய அருள்நயன வரமினிய –
‘ஐம்’மா அகிலாண்டேஸ்வரி உமையே
(12)

ஆதார மாயுனையே அடிபணியும் ஓம்காரம்,
அழகுருவம் மிளிர் அலங்காரம்,
அதரமோ கோவைசெம் பவளமோ உவமானம்,
ஆகுமுக் கடவுள் துதியாரம்,
பாதார விந்தமுன் பணிவானர் பரிவாரம்,
பராபரம் எலாம் உன்னிடம்,
பற்பதமும் பொருளும் சுற்றுலகும் புகழும்
பரிவே அகிலாண்டேஸ்வரி உமையே
(13)

நறுமணமோ கூந்தல்நெளி நளினமோ மிகஅழகு,
நாயகிநீ மாயன் பெருமை,
நசித்தசுரப் பேராசை நொடிப்பொழுதில் தீர்க்குமுன்
நற்சினமோ நடத்தும் திறமை,
­இருபதமோ தாமரைகள், ­இணையேது உவமானம்,
­இனியமுகக் காந்தி அருமை,
இ­கபர சுகமருளும் இ­ணையடியோ சிவனுலகம்
ஈசர் அகிலாண்டேஸ்வரி உமையே
(14)

நான்முகனும் பணியுமுன் நல்லடிகள், நின்னழகு
நளினம்நீர் முகிலின் நிறமே,
நகைமணிகள் அணியுமுன் தகையழகு புவனங்கள்
நவிலுமுன் பெருமை நிதமே,
காணுலகை நீர்வளமும் கால்நிலமு மாய்வகுத்த
காலடிசெந் தாமரை உருவமே,
காலனணு காதசிவன் காதலியே, காந்திமதி
கா அகிலாண்டேஸ்வரி உமையே
(15)

பாவம்அழித் திட்டே, பல்கோடித் தேவரும்
பணிந்தேற்கும் பர தேவதே,
பல்வளமே நல்கிவரச் செல்வம் அருள்சீரே,
பர்வத ராஜனிளங் கனியே,
மேவுமெழுத் தெட்டான மெய்யே, அணிபரவும்
மேனியே சுடரின் அரிதே,
மெய்வளமே வளர்தருவே, பொய்யழிவே கதிர்விழியே –
மேவி அகிலாண்டேஸ்வரி உமையே
(16)

காவிரியின் மணலுனது குடியே,
கலங்கமிலாத் தாமரை யுன் அடியே,
காமனவித் தானிடத்துப் பதியே,
கருணைமழை பொழியும் அருள்விழியே,
பாவிரியும் பாவலரின் கதியே, இரதியின்
பதிக்கழகும் பலமுந்தரு நிதியே,
பூவிரிவே, தருவே, அருட்கடலே, தாடங்கம் –
புனையும் அகிலாண்டேஸ்வரி உமையே
(17)

எல்லா உருவும்நீ, எழிற்கருடப் பதாகை
ஏற்றரிமால் மயன் சோதரி,
இ­டைவாள் உடைகாலன், மயில்வே லவன்நேயம்,
இணைவாள், வர தாயகி,
இ­­ல்லாப் பகுப்பெல்லை இ­ல்லாத் தொகுப்புநீ,
ஈந்தருட் சுடர்க் கோடிநீ,
இளையமதி தலையணிய கலையன்ன வாகினி
ஈசர் அகிலாண்டேஸ்வரி உமையே
(18)

கங்கையலைச் சுழியோநின் கலையதரத் திருநாபி,
காதணிகள் மின்னும் கன்னம்,
கந்தருவர் தேவர்நிலை கண்டமுனி புங்கவரோ
கருதுவதும் உந்தன் எண்ணம்,
அங்கமணிச் சந்தனமோ அழகுருவக் கம்பீரம்
அமிர்தசா கரத்தில் அன்னம்,
ஆளுமையோ, அரைமதியைப் பூணுமையன் சதியோ
அருள் அகிலாண்டேஸ்வரி உமையே
(19)

கலையிசையில் மயங்கும் மலையரசு வணங்கும்
கவினிசையே சிவ தர்மிணி,
கண்மலரும் நாதம் பண்வளரும் வேதம்
கரைபவரும் நின்னடி அம்மணி,
மலையுனதே கல்வி தனமருளும் செல்வி
மகிழ்வுறநல் வர தர்மிணி,
மலைமகளே, இசையின் தலைமகளே, மிசையின்
மாமணி அகிலாண்டேஸ்வரி உமையே
(20)

மறைவே, மாமறைவே, மறையோர் மாபயனே,
மல்லிகை மாலை அழகே,
மந்திர முன்னுருவே, மணிமார் பகமுனைவே,
மாலை அணிகோல எழிலே,
முறையே முனைந்தமரும் முதலே, முழுஞானம்
முனைப்பிக்கும் குரு எண்ணமே,
முரசமென கொலுசுபதம் சரசமிட, முறையோரின்
மோகனமே அகிலாண்டேஸ்வரி உமையே
(21)

மாமணியின் பேரோசை யாலசுரர் மடிவருன்
மாவடிவம் கார்முகில் நிறம்,
மதியுடனே கதிருனது மணிவிழியே, கர்மநெறி
மார்க்கத்தின் பலனுன் வரம்,
தூமணியே துட்டர்படை தூர்த்தநடை போர்த்தயிடி
துணையடியே வினைக்குப் புறம்,
தொடரான பேரொலியே துயரோட்டும் காரிகையே
தூயவளே அகிலாண்டேஸ்வரி உமையே
(22)

நால்வரமும் தருங்கருணை நாயகியே, சாமுண்டி,
நலமருளும் பர தேவதே,
நளினமுன தடிகள்மதி வதனம்நிதி சண்டிகையே,
நட்டநடு வட்ட மலரே,
வானவரும் காணுலகம் ஆனவடி வானவளே,
வார்த்தசெவி பூத்த குழையே,
வரைவிழியின் சலசலப்பில் இறையவனின் குடியிருப்பு
வடிவே அகிலாண்டேஸ்வரி உமையே
(23)

புன்னகையே வெண்ணிலவுத் தண்ணழகே, பூக்கின்ற
புத்தொளியே கதிரின் கதியே,
பூமதியே ஆபரணம் புனையழகே கலையே,
பூரணமே சுதந்திர நந்நிதியே,
கண்ணழகே மதியுடனே கதிரொளியே படரிருட்டைக்
காணாமற் கரைக்கும் விதியே,
கரைகாணா மறைமூலக் காரணமே ஒளியே
கா அகிலாண்டேஸ்வரி உமையே
(24)

ஜம்புகேஸ் வரநிதியே, ஜனார்த்தனன் துதியே,
ஜகதேவ ரடையும் கதியே,
அம்பிகையே தருவே, நம்பியவர் திருவே,
அழற்பிறவி அறுக்கும் மதியே,
துன்பமறு மருந்தே, இன்பரு நந்நதியே,
தொடர்கங்கை சடையன் இமையே,
தூயநீர் மயமே, நகைமுகையே சிவமயமே
தூரியமே, அகிலாண்டேஸ்வரி உமையே
(25)

பரிமளிக்கும் நதியளைந்த விரத ரூபம்,
பசுந்தென்றல் காவிரிநல் நதியின்தீரம்,
பரிசளிக்கும் ஞானவரம் கேச வாசம்,
பரிவண்டோ முணுமுணுத்து முகருமீரம்,
பளபளக்கும் நகையணிந்த பரம தேகம்,
பாதமலர் சலசலக்கும் தண்டைநாதம்,
படபடக்கும் மத்தளமோ டிசைகள் வாழ்த்தும்
பங்கயமே அகிலாண்டேஸ்வரி உமையே
(26)

பரஞானச் சுகக்கடலின் படகான நலமே,
பரஅறிவுச் சுடர் மூலமே,
பர அறிவே, அறிந்துணரும் பரசுகமே வளமே,
பரிசாகத் தரும் சீலமே,
மலடான மனக்கருவில் சுடராகும் அறிவே,
மாறுலக மாகும் வடிவே
மாறாத சிவஞான மையமே மனைமாட்சி
மாதே அகிலாண்டேஸ்வரி உமையே
(27)

தட்டையெனுந் தாடங்க மானபலநகையே,
தண்வட்ட முக மோகினி
தடுத்தசுரர் கொடுத்தபயம் தருகின்ற முகையே,
‘ஹம்’மூல ஹர யோகினி
நிட்டையொடு புன்னகையில் நிலைத்த சிவமயமே,
நின்னூஞ்சல் அருட்காமினி,
நிர்மலமே லோர்க்கருளே தும்துமிமே ளோர்த் துதியே
தூயவளே அகிலாண்டேஸ்வரி உமையே
(28)

பரஅறிவுப் பொருளுனது பாதமே, பகுத்தறியும்
பாக்கியம் புகட்டும் குருவே,
பகுத்தறிய முடியாத பரவுணர்வே, தவஞானம்
பயில்வோர் துதிக்கும் அருளே,
சிரவடிவுக் கலையணியே, சீரமிர்தச் சாகரச்
சின்மையச் சுடரிள மையே,
சீர்பசுமை வனமாலி சிரம்பணியு மிளங்கொடியே
ஸ்ரீ அகிலாண்டேஸ்வரி உமையே
(29)

நிலைத்தபசு பதிசதியே, நெடுமாலின் துதியே,
நிறுத்திட்ட மன அன்னமே,
நிச்சயமே, மாற்றத்தின் நிர்ணயமே, நற்கதியே,
நிலனோர் தின எண்ணமே,
முளைத்தருளிக் காத்தவிக்கும் முத்தொழிலின் முதலே,
முனைமனம் கவர் வண்ணமே,
மூலசிவ சீலம்நிலை கோலமெழில் நிலையே
முடிவே அகிலாண்டேஸ்வரி உமையே
(30)

தென்னாக மகநெறியின் தேறலே வரதேவி,
தேர்ந்தடங்கும் ஞான முடிவே,
தேங்கருணத் திரட்டே, தெளிமுத்துப் பல்வரிசை
தேனதர மான வடிவே,
சொன்னா லடியானைச் சுடரே, தர்மங்கள்
சோதித்து அறியும் முறையே,
சோபிதமே எலாமருளும் சுந்தரமே ஆறுதலே
சூரணமே அகிலாண்டேஸ்வரி உமையே
(31)

தூயமெய் ஞானம்நீ, துகிற்சுடராய், சூரியனாய்
துலங்கும் அலங்காரி நீயே,
தூயமக ளீர்நடுவில் தீபம்நீ, மறையோதும்
தூயவரின் உருவும் நீயே,
தீயெனவே சந்திரனும் தினகரனும் நினதுவிழி,
திருவருள் அடியோர்க்கு நீயே,
திசைகளுன் அருட்காவல் இசைமுனிவர்க் கடிகாதல்
தீர்க்கமே அகிலாண்டேஸ்வரி உமையே
(32)

ஏழ்மையும் இலாமையும் இலாமை யருளே,
இன்செயல் துயரின் முடிவே,
எண்ணறிய துர்க்கைமுத லானபர சக்திகளும்,
ஏற்றியடி போற்றும் வடிவே,
சீர்மையே கரும்புல்லின் கூர்மையே உருவே,
சீரிலார் அறியாப் புதிரே,
சின்மயி துர்க்கைமுனி துர்வாச ரும்பணியும்
சீதனமே அகிலாண்டேஸ்வரி உமையே
(33)

அறமுணர்வே, ஆரணியின் ஆதார மலைமகளே,
அருமின்னல் ஒளிக் காந்தமே,
அற்புதமே மலர்மல்லி ஆரமணி மாமணியே,
அறவானோர் தொழும் சாந்தமே,
அறப்பொருளே இன்பமொடு ஆனந்த மேவீடாய்
ஆவநீ மும்மல நோயினை
அறுப்பவளே அறவோரின் ஆழ்நெஞ்சத் திருப்பவளே
ஆனந்தி அகிலாண்டேஸ்வரி உமையே
(34)

அத்துவித ரத்தினங்கள் அணியுமுன தங்கம்,
அதுமழை முகிலின் வண்ணம்,
ஆனந்த நடனரசி அருமீன்கள் தங்கும் ஆபரணம்
தலையில் மின்னும்,
தத்துவமே மலையரசே, தகைமாலின் சோதரியே,
தர்மதே வர்க்கு யின்னும்,
தக்கோர் புகழ்புகலே தகையடியே முதுநிலையே
தாயே அகிலாண்டேஸ்வரி உமையே
(35)

பனிமலையின் தனிமகளே, பழமறையின் பொருளே,
பாருயிரின் நிலையே, தெளிவே,
படருலகின் அருட்தாயே, இருளுலகின் அருளே,
பாதிமதி பூத்தமுடி எழிலே,
தனிவனமென் முனியுருவே, தண்ணலரும் விழிக்குவளைத்
தாமரையே, தவறாத் தவமே,
தர்மமே துயரமிலாத் தருணமே தூய்மையே
தாயே அகிலாண்டேஸ்வரி உமையே
(36)

பங்கயமே, முகமதியும் பங்கயமே, பலமேநின்
பாதம்மஹா லக்ஷ்மி துதியே,
பதுமமர் பூரணமே, பதுமநாபன் நிதியே,
பாக்கியமே அயனின் கதியே,
மங்களமே தாமரையே, மாறுலகுக் காரணமே,
மந்திரம் ஐந்தீசன் சதியே,
மாறுயிலா தருள்புரியும் மார்க்கமே முக்தியெனும்
மாதே அகிலாண்டேஸ்வரி உமையே
(37)

மொட்டவிழ்ந்த குவளையோ முனைவிழி, இளம்பிறை
முன்நெற்றி அழகு தானோ,
மோகித்து ஆடிடும் நாடியாம் அரவமிடை
முளைத்தஉயிர்ச் சக்தி தானோ,
சட்டமோ சான்ற மொழிச் சத்தமோ,
சுத்தஒளிச் சஞ்சலமற்ற மணியோ,
சத்தியப் பேரொளியோ, சுற்றரவ அரசுவரச்
சாகரமோ அகிலாண்டேஸ்வரி உமையே
(38)

செல்வமே சிற்றிளமைச் சீரே, பலவுருச்
செயலுருவே, செம் பவளதரமே,
சேதனமே ஆதவனாம், சேர்புகழ்வார் ஆரமதிச்
சேகரணி கலை யமுதமே,
அங்கமே செம்பருத்தி அழகே, புவனங்கள்
அழகுதர மடிப்பின் இடையே,
அயனும் இந்திரனும் அகத்தியனும் பணியும்
அருளே அகிலாண்டேஸ்வரி உமையே
(39)

எண்ணத்திற் கெட்டா எழிலே, சுகவீச்சே,
எங்கும் பரப்பும் மொழியே,
ஏகனித மேஉணரும் எண்ணமுத லேபிறவி
எல்லாம் அறுக்கும் வழியே,
கன்னலே, கதியுனது காலடியே சீரடியார்,
கங்கா தரனின் இடமே,
கனித்தவளே பானுமதி விழித்தவளே, மாலும்பணி
காரிகை அகிலாண்டேஸ்வரி உமையே
(40)

மாயம்நீ, காமன்பணி மாலினி கருநீல
மரகத வண்ணமும் நீ,
மாசிலா தானமன மோகினி, மயக்கத்து
மாயம் அவிப்பதும் நீ,
மாதவி ரத்னமணி மேதினி தாமுனிவர்
மாதவப் பயனெலாம் நீ,
மணிவயிர வளைமாலை மலரணியும் மாதங்கி
மாதே அகிலாண்டேஸ்வரி உமையே
(41)

மதிபரிதி விழியுனக்கு, மாதுனது ஒளியிரவி
மச்சமெனக் கூர் நயனமே,
மட்டான மதிக்கெட்டா மாதேநீ மீன்கொடியான்
மதனுக்கும் அரு ளபயமே,
நிதியருளே, சுவையமுதே, நீண்டதரு மீமாம்சம்
நிகண்டு முதலான தறியும்,
நித்தியமே, கதிரொளியின் சத்தியமே, கனலேரும்
நீயே அகிலாண்டேஸ்வரி உமையே
(42)

முக்தியே, கலைசிவனின் முதலான சக்தியே,
முழுமறை காட்டும் வழியே,
முற்றறிய பற்றறியும் முடிவே, முக்கடவுளொடு
மூட்சிக வாகனன் துதியே,
சக்திமூ லாதாரச் சாரமே, சிந்துநகைச்
சாருமேதா மரைமுனி வரும்,
சரணசின் முத்திரையால் தரநல்ல முத்தியருள் –
சாதகி அகிலாண்டேஸ்வரி உமையே
(43)

யாகம்நீ, யாகபலனும்நீ, யமனார் துதியும்நீ,
யட்சரசன் குபேரன் நிதியே,
யாவுபல ரோகநி வாரிணி, காலினால்
நமனுதை நாதன் சதியே,
மாலினி, மாலின் துதியும்நீ, மாமந்த்ர
மாமேரு சக்ர பதியே,
மாதா டங்கமணி மாதரசி சக்திகளின்
மாதவி அகிலாண்டேஸ்வரி உமையே
(44)

முனிமன மோகினிராமன் முறைவர தாமினிதாகும்
முடிமதி சூடிடும் வடிவே,
முனையடி திருமகளாகும் முவ்வுல காள்பவரேகும்
முழுமதி யாம்முக அழகே,
பனிமலை முடியுரையாளும் பரமனின் சுகவதியாகும்
பதிரதி நாடிடும் அருளே,
பகையொடு விருப்பறியாரின் பயனுறு அகநிதியாகும்
பரகதி அகிலாண்டேஸ்வரி உமையே
(45)

சுந்தரி எழிற்கடலோ, சுடர்நெற்றி விழிக்கணையோ,
தொந்திசரி தந்திமுகன் துணையோ,
சோடியடி தாமரையோ, சுருண்டமுடி இழையோ,
சோபித்த இளநெற்றி பிறையோ,
மந்திரமோ ராமனுள மாதவமோ, காவிரியின்
மடியலையும் தவமோ, மாலிறையோ,
மறைந்தருகும் இடையோ நிறைந்தருளும் இடமோ –
மாதரசி அகிலாண்டேஸ்வரி உமையே
(46)

வேதா மறைப்பொருளே, வெண்தா மரைவிழியார்
வேண்டித் துதிக்கும் நிறையே,
வேதறிய வார்த்தைகளும் ஓதறியாத் திருவே,
வேய்வாம தேவிக்கு உயர்வே,
மேதா மலைமகளே, மென்னுயிர்க்குள் இன்னுயிரே,
மேலிடப் பிராண நிலையே
மெய்யே, இசைப்பிரியே, அய்யனரி அருளே
மேவும் அகிலாண்டேஸ்வரி உமையே
(47)

அமைதியளே, அரனரையே, அரைமதியை அணிமணியே,
ஆழ்வயிறு, கார் வண்ணமே,
அறுதியுடை அடியவரின் அருநலமே, தனிபலமே,
அமரர்க்கும் அருள் அன்னமே,
இமையவளே, குமரனருள் ஈஸ்வரியே, கலைவாணி,
இறுதியிலாச் சைவ முதலாய்
எல்லாம் கடந்தநிலை வல்லாய் பரஅமைதி
எழிலே அகிலாண்டேஸ்வரி உமையே
(48)

அறுமூல சக்கர நடுவீடு நின்னது,
ஆறெழுத் திரு இளமையே,
ஆதாரமாம் முப்பத் தாறான தத்துவம்,
அறுமூலம் தரு வளமையே,
குருகுகனும் புகழுமறு மேருரு நின்னது,
குமரகணன் ராமன் அருளே,
கூர்த்துடலின் தடமாறு கொண்டசிவப் பலமாறு
கோமளி அகிலாண்டேஸ்வரி உமையே
(49)

தக்கார் தக்காசை தருகின்ற தருவே,
தன்மையோர் பணியும் உருவே,
தண்மையே, நன்மையே, தனிச்சிவன் அண்மையே,
தவசிவ மான திருவே,
அக்கார் அருள்நிதியே, ஆதார சாட்சியே,
ஆக்கமலர்க் குளிர் நயனமே,
அமர்க்குயரு மிருமுலையே, ஆக்கியெலாம் காத்தருள்
அம்மா அகிலாண்டேஸ்வரி உமையே
(50)

‘ஹாஹா’ எனமூன்று ரீங்காரந் தொழுதடி
ஆரமலங் கார நிலையே,
ஹம்ஸமெனும் அன்னமகிழ் அம்சமுன் செல்வங்கள்
‘ஹம்’மூல மந்த்ர கலையே,
ஆஹா திருவானைக் காவா ரட்சகி
அரிஅயன் ஹரனின் துதியே,
அம்ஸகா யத்ரிதட ‘ஹம்’காரணி
சிவே அகிலாண்டேஸ்வரி உமையே
(51)

‘லம்’ நாத வடிவம்நீ, தடியுடையாய், நின்னுடல்
படரிளங் கொடி யல்லவோ,
‘லம்’ ஓத வடிவினால் அடியுளார் பணியுவார்,
‘க்ளீம்’ வடிவும் நினதல்லவோ,
அம்மா என்றலரி அமரர்அப் புறமோட,
ஆலஹா லமாம் பாலினை
அன்பா லருந்தியரு ளன்பனுடை அன்பே
ஆரமுதே அகிலாண்டேஸ்வரி உமையே
(52)

கடலும் நிலமும் காண்புவனம் எல்லாமும்,
தடமும் உணர்ந்த தருவே,
கரிமாலின் நலனே, காரிருட் தட்சனின்
கணக்கை அளந்த திருவே,
திடமான நோக்கே, திருமலையின் மகளே,
திருவருளால் ஆனபர உருவே,
திறமையிலா தென்மடமை தெரித்தகவித் தவற்றை,
தெய்வமே பொறுக்க வேண்டும்
(53)

அன்னைமலர் அடிகளிலே அணிகளாக – இனிமை
அளிக்கின்ற நறுமண மலர்களாக,
இன்னுலகைத் தெளிவாக்கும் மணிகளாக – முக்தி
இனிதேனாம் சிவனடியின் அருகிலேக,
முன்னவினைப் பயனதனால் சொன்ன வார்த்தை
முழுப்பயனை துதிப்பூ மாலையாக
அன்னையருள் தேனியென ஆர்த்த மேலோர்
அனவருமே அடையட்டும் அமைதிதானே!

மீ. ராஜகோபாலன்